News RSS

還押人士零食/日用品計劃 update (25/2/2020) : 手足親友而家可以點做?1. 90封Jimmy Jungle 嘅公開信已由邵家臻議辦寄出,請手足親友靜心等待手足收到佢哋嘅獨立編號。*如果擔心認識嘅還押/ 在囚手足唔喺我哋嘅名單入面,可以聯絡邵家臻議辦*2. 好多手足親友都未必有fb/ Ig/ tg,所以麻煩大家將依個計劃話俾有需要嘅人知,Jimmy Jungle 嘅目標係幫到晒所有手足。3. 留意我哋Fb/ Ig,我哋會定期出post交代詳情。有心人而家可以點做?1. 提供直接經濟支援俾手足,買Jimmy Jungle嘅零食/ 日用品資助盒,我哋會代你將物資送到手足親友手上,再由佢哋送到手足手上。2. Jimmy Jungle喺成個還押資助計劃中喺無抽取任何收入之下會承擔採購、倉租、運輸物流和中間調協等工作,呢啲工作都需要一定嘅營運資金,雖然呢一刻Jimmy Jungle都未至於要告急,但長遠黎講都希望大家可以支持下Jimmy Jungle嘅老本行去買下零食。3. 心靈支援。手足唔怕犧牲自己,但佢哋最驚嘅係犧牲完,卻發現一切事物人都無變過。事情可以丟淡,物件可以修補,但人心絕對唔可以遺忘依一切。請大家參與和你做筆友活動,俾佢哋知道有好多人承繼佢哋嘅意志。4. 將手足零食/ 日用品計劃share 出去(唔介意嘅話,可以like 我哋fb同follow 我哋Ig。)

繼續閱讀

依一句,係我哋一位好朋友喺收押所寫俾我哋嘅說話,亦係令我哋最刻骨銘心嘅一句,希望今日轉贈俾所有同行兒女。 我哋今日推出嘅>>資助盒系列<<,並唔係一張俾大家好過啲嘅「贖罪券」,大家務必要搞清楚:只有堅持到勝利一刻,先係對雨傘革命義士、魚蛋革命義士、被捕手足、還押手足同烈士嘅最好嘅交代。 Jimmy Jungle現推出三款資助盒 : *為咗令盤數清晰啲,如購買資助盒,務必要與店內嘅零食分開訂單去買!如果發現有問題,我哋會主動聯絡你* (1) 還押手足零食資助盒A - $130 (士多價~$178) (2) 還押手足零食資助盒B - $130 (士多價~$240)(3) 還押/在囚手足日用品資助盒 - $75 (士多價~$131) 資助盒價格包括貨品成本及網上購物系統手續費。整個計劃中嘅物流運輸及人工係無計入喺資助盒價錢當中,會由Jimmy Jungle 一手承擔作為心意。士多價價錢為我們調查所得,僅供參考。 由於以下物品為非必須品 / 不定期消耗品,只接受以成本價購買:牙刷、潤唇膏、牙線、潤手膏(請留意詩樂氏消毒濕紙巾全城缺貨)   資助盒運作方式:   有心人要做嘅野:1. 喺網上選擇,購買「零食盒」或「日用品盒」送比手足。(零食盒A + B =極大食手足約2星期量;日用品盒=約1個月量;詳情請睇懲教署網頁)2. 同身邊嘅人介紹呢個計劃,愈多人買,就愈多手足受惠!3. 留意住我哋Facebook/ IG,會定時公佈已送出比手足的數量! 手足親友要做嘅嘢:1. 從手足取得獨立編號(見Q&A.2)後,聯絡Jimmy Jungle核實係手足親友嘅身份。2. 從清單選取需要的物品。(留意每件物品的上限數量喔!)3. 收到我哋回覆確認後,我哋會俾幾個取貨點你哋揀。4. 到揀選好嘅取貨點拎貨,會再一次以獨立編號確定為手足親友先俾貨。5. 喺探訪手足時將物品帶入去比佢!如果無足夠已預購嘅物品,手足親友仍然可以用成本價購買物品。 Jimmy Jungle要做嘅野: 1. 接受有心人的預購,將已預售嘅貨品集成一個pool。2. 接受親友落單,整理回覆,預備好每位手足的「執貨清單」及運到各取貨點。   Q&A Q1: 可以點樣幫手?A:  (1) 買資助盒,直接減輕手足家人嘅經濟負擔。(2) share呢個信息出去!(3) 多啲幫襯Jimmy Jungle,以減輕我哋營運成本嘅壓力。 Q2: 點樣確認資助盒能送到比真手足,而非其他還押/在囚人士?A: 得到關注囚權嘅邵家臻議員相助,已有記錄嘅還押/在囚手足將會陸續收到有關獨立編號嘅信,佢哋會將編號轉告親友,親友再聯絡我哋核實;所以我哋可以確保佢哋係真手足嘅親友。 Q3: 如果冇人買資助盒會點?A: 手足親友仍然可以用成本價向Jimmy Jungle 購買零食及日用品。 Q4: 點相信Jimmy Jungle唔係呃錢呀?A: 我哋會每個月尾係我哋嘅Facebook/ IG,公佈該月份各資助盒嘅銷量,同埋已轉贈手足嘅數字。如果大家有其他建議,歡迎提出。 Q5: 如果認識嘅非手足嘅還押/ 在囚人士,可唔可以照同Jimmy Jungle買貨?A: 可以,歡迎同我哋聯絡,但係只能用原價購買(但都應該比士多平)。

繼續閱讀

由於<<還押人士零食計劃>>推出之後反應都唔錯,係度先向大家交代一下進展 計劃進展:1.  所有零食暫時都有現貨,由於反應熱烈,我哋星期一會加單入貨,希望唔會出現無哂貨嘅情況。2. 部分日用必須品我哋係有現貨嘅,大家唔洗怕羞。3. 直至現時為止,我哋已經成功送出咗五張單,而亦有超過三張喺黎緊呢個星期送出4. 採購方面,經好多熱心人士報料,星期一會嘗試打電話去查詢5. 我哋已經同邵家臻議員辦事處聯絡,Jimmy Jungle 會用信嘅形式將依個計劃和服務通知已知嘅還押/被囚手足,手足可以跟據信上的指示,轉告家人黎接觸我哋。(邵議員會代我哋轉寄俾手足,jimmy Jungle 唔會拎到仼何一位手足嘅名同號碼,大家放心。)6. 有幫緊還押手足嘅社工團體都有同我哋聯絡,會幫我哋直接同手足家人宣傳和轉介 Q&A: 1. 幫到幾多?比起香港沉重嘅生活費,慳到嘅錢的確唔算多,但除咗係一份心意之外,仲會係對手足家庭嘅實際幫助。家屬入貨有個困難,就係日用品、零食係有懲教處指定嘅款式和份量,呢啲物品都唔容易在市面上買到(例如黑人牙膏double action嘅100g裝只會係買兩支250g 嘅贈品,好少地方可以獨立購買)。如果我們能夠集齊大部分日用品和零食,手足家庭就可以慳返周圍搵既時間同心力,而又唔需要在士多用比較貴既價錢先買到。 2. 可以點幫手?收到唔少朋友pm想透過我哋直接送零食俾手足,我哋暫時做唔到,因為零食或日用品必須係由探訪嘅親友入,所以現階段只能由佢地喺探訪前拎貨,再送入去比手足。如果你唔識還押手足(或被囚手足),唔緊要,share 依個資訊出去,久而久之就會傳到去有需要嘅人嗰度。當我哋有周全嘅方法俾大家出一分力嘅時候,會再公佈。 當然我哋本身營運都需要一大堆開支,例如人工、倉存等等,幫襯我哋買零食會係一個好大嘅支持,讓我哋可以繼續幫助到手足。 3. 長遠目標?我哋嘅遠景係可以成立到一個聯網,手足家人都會固定地黎我哋度拎貨,到時我哋就可能會推出一啲計劃,俾有心人同我哋一齊分擔手足家人用喺零食同日用品上嘅經濟負擔。 如有任何疑問,可以同我哋聯絡 或 Telegram @jimmyjungle 搵我哋。 有關懲教署認可交來物品請睇認可交來物品

繼續閱讀

唔知大家知唔知,還押人士喺親友探訪嘅時候可以交低一啲受懲教署認可嘅物品,包括一啲特定款式嘅零食,同埋日用品。(詳細可以睇 - 認可交來物品)零食方面雖然款式寥寥可數,但在外嘅親屬喺搜購嘅過程並唔容易,因為必須要指定款式嘅緣故,往往都要左撲右撲,撲唔到就要逼住幫襯還押所附近賣貴貨嘅士多。Jimmy Jungle 雖然而家嘅力量仲係好微小,但亦希望可以略盡綿力幫還押人士嘅親友慳返啲時間同金錢,我哋會以成本價去發售數款零食。由於我哋係以成本價出售,所以請原諒我哋無辦法用送貨形式送到府上,只可以喺地鐵部分站約大家交收。希望大家可以同我哋聯絡 或 Telegram @jimmyjungle 搵我哋。 另外,我哋除咗積極咁搵緊其他零食嘅貨源之外,都努力緊搵以下幾款日用品(零食始終唔係必須品,幫助未必好多):1. 花王飛逸洗髮水400ml2. Lux 藍色肥皂 80g3. 詩樂氏消毒濕紙巾4. 奇美潤膚洗手液600ml5. 黑人牙膏 50/100g 或 高露潔牙膏 50/100g 詳細請睇認可交來物品! 如果知道點入平貨都請聯絡我哋,感謝。 覺得有用嘅話,麻煩各位share 出去,好人一世平安。

繼續閱讀

本土零食網店  - Jimmy Jungle...上線啦! 經過我地一輪又一輪既悉心採購,Jimmy Jungle已經有接近200款產品俾大家選擇喇!與此同時,我地亦陸續引入唔同既新貨,等大家keep住對我地既新鮮感❤ 另外!新開張既promotion優惠!只要係facebook share我地呢個開張post,或者係ig share by story (又或者係下面comment度tag 3個朋友仔),Jimmy Jungle就會送一個9折code俾你!名額有限,送完即止! (Share左我地呢個post既人記得inbox返俾我地知呀或者直接tag返我地@jimmyjunglesnacks ) 之前subscribe過既朋友,Jimmy Jungle 係唔會食言架,我地會另外email一個9折 code俾你,買滿$100就用得喇!   數還數 路還路有d重要既terms係呢度先講清楚:1. 全單買滿$100即可使用9折code。(只適用於所有散買產品,送禮占及零食訂閱計劃不包括在內)。 2. 9折code將於2020年3月31日到期。3. 如閣下選擇上門送貨服務,只要全單買滿$220 (包括9折優惠後),即可享用免費送貨服務;如閣下選擇智能櫃自取服務,只要全單買滿$150 (包括9折優惠後),即可免費享用智能櫃自取服務。 4. 受疫情影響,如閣下選用順便智能櫃自取服務,貨品最快於3月送達,部分智能櫃亦可能暫停服務,詳情請參閱順便智能櫃官方網站。5. 上門送貨服務如常,不受1. 影響。6. For details,請詳細參閱我地既送貨須知

繼續閱讀